عودة مكفر المسيحيين للشاشة فى اقل من 24 ساعة؟ واللى مش عاجبه يخبط دماغه فى الحيطة اويرحل

رجع تانى للظهور على ( الشاشة ) بعد ( منعه ) من الظهور لمده ( 24 ساعة ) !
آه بجد أصل سبب ( منعه ) من الظهور كان بسبب إنه لم ( يأخذ تصريح بمزاوله المهنه ) فقط لا غير
و ( اللزج ) طبعا فى خلال 24 ساعه كان كمل أوراقه و تقدم لما تسمى ( نقابة الإعلاميين ) فأعطته الإذن و عاد للظهور .
طيب و موضوع ( تكفير ) جزء من المجتمع وضعه إيه لو سمحت ؟
هوه ( كفر ) مين ؟؟
( غير المسلم ) !
لأ عااااااادى إيه الحساسية الزايده دى و بعدين هوه يعنى أول واحد ؟!!
صحيح مش أول واحد بس ده من المفترض ( إعلامى ) و الدوله سمحت له بالظهور للناس و مش من المفترض إنه يصدر منه تصريح زى ده متطرف .
طب مين قال إنه بيقصد ( المسيحيين ) تحديدا هوه قال ( غير المسلم ) و اللى على راسه بطحه بقى .
أيوه مين يعنى فى المجتمع ظاهر ( غير مسلم ) إلا ( المسيحيين ) ؟ ( اليهود ) مش موجودين و ( البهائيين & الملحدين ) متخفيين و بعدين حتى لو كل الأديان دى موجوده مش من حقه أن يقول كده على جزء من الشعب .
يا سلااااااام !! يعنى يغير ( دينه و معتقداته ) علشانكم إنتم بتستعبطوا ؟؟
و فين القانون و المواطنه و المساواه و محاربة الإرهاب و التطرف ؟
( القانون ) مش بيدينه علشان مأخوذ من ( الشريعه ) و هو لم يقل شيئ مخالف لها و حتى لو رفعتوا عليه قضيه ( القانون & الحكومه ) حيطلعوه زى الشعره من العجين لأنه تكلامه وتكفيره بيعجب مسئولين؟ . أما بقى مساواه و مواطنه أهو هوه ده اللى عندنا عجبكم أهلا و سهلا مش عاجب خود باسبورك و على أول طياره و سافر و سيب البلد البلد بلدنا و متدينه بديننا و حكاية محاربه التطرف دى اه بنحاربها و دى طريقتنا و مش أنتم اللى حتعلمونا إزاى نحارب الإرهاب .
و فى النهاية نخبط رؤوسنا فى الحيط و ظهر ( اللزج ) المكفراتى مره ثانية و فعلته الشنعاء عدت لأنها من يوم 8 أغسطس و الكل ساكت !!
( اللزج ) أقوى و أهم من ( 18 مليون غير مسلم ) فى المجتمع !!

نقلا .. عن نريدها علمانية