في العهد القديم كان الصلب تعبير عن غضب ربنا على المصلوب. والكهنة اليهود كانوا عاوزين يقنعوا الشعب إن ربنا غضبان على يسوع علشان كده إختاروا موت اللعنة من غير ما يعرفوا إن ده بسماح من ربنا لأن هنا يسوع بيموت بالنيابة عن كل البشر .. فكان لازم يموت موتة تعبر عن عقوبة البشر لما سقط أبونا آدم وأمنا حواء لكن أهم حاجة نخلى بالنا منها هي إن الصليب أصبح عرش يسوع المسيح. عارفين ليه ؟ .. لأن يسوع هزم الشيطان بالصليب ومن ساعتها المسيح الظهر لينا ملكه وسلطانه على الحياة الأبدية. والصليب أصبح سلاح كل المسيحيين ضد الشيطان، يغلبوه بقوة يسوع اللي إتصلب على الصليب، ويدخلوا الحياة الأبدية ويعيشوا مع يسوع . وزي ما كل الشعوب تعلق صورة ملكها وهو على العرش، إحنا المسيحيين بنعلق صورة يسوع المصلوب في كل مكان، وبنرشم الصليب على نفسنا وعلى كل حاجة عايزيين نباركها لأن يسوع هو ملكنا ومخلصنا و الصليب بالذات بيفكر الناس بالنبوات اللي بتقول “ثقبوا يدي و رجلي” و كمان المزمور بيقول “الرب ملك على خشبة” .. و كمان الصليب يمثل “شجرة الحياة” .. و السيد المسيح عليها هو الثمرة الحلوة اللي لما صالحنا مع الله الآب نستحق إننا ناكل من الثمرة اللي هي جسد المسيح و دمه فنحيا إلى الأبد
0 comments