بالمستند مخالفات الراهب يوئيل المقاري ( قبل تسلم قداسة البابا شنودة الدير )

صفحات مجهولة من تاريخ دير ابو مقار

رسالة مهمة جدا بالوثائق

خلافات الراهب يوئيل المقاري مع شيوخ ديره ومع المتنيح الانبا ميخائيل وخطابات من رهبان الدير الكبار ضد تصرفاته للمجمع المقدس

نص الرسالة التي وصلتني من احد الاباء الاساقفة

بما انك يا دكتور مهتم بالتاريخ اللي بعض الناس بتحاول تزوره
بعض ناس بعتولي تسجيل منسوب للراهب يوئيل المقاري اهم ما جاء فيه:
“عشنا مع ابونا متى المسكين حياة رهبانية صادقة
التسيب الذي حدث في الدير بعد دخول الأنبا شنودة هو اللي تسبب في قتل الأنبا ايبيفانيوس
لم تكن هناك خلافات لاهوتية او عقائدية ولكن كان في رهبان كانوا عايزين حياة الفوضى
الرهبان استباحوا لنفسهم الخروج من الدير بدون أي قيود .. وبقوا يقتنوا ويتملكوا

ثم قال نصا: “هذا كله حصل بعد ما قداسة البابا شنودة اعطى الضوء الأخضر لهذه التصرفات الحمقاء”
اه قال نصا “التصرفات الحمقاء”

في الحقيقة استغربت جدا الكلام ل3 اسباب

أولا: البابا شنودة استلم الدير بناءا على طلب الانبا ميخائيل اللي طلب اعفاءه من الاشراف على الدير .. في منتصف 2009 وتنيح البابا شنودة في أوائل 2012 .. ومرضيش البابا يجيب حد من برة الدير يشرف عليه عشان هما كانوا خايفين يجيب حد يضايقهم.. ساب شيوخ الدير يديروا .. وكانت فترة احداث سياسية ومتاعب صحية للبابا مزارش خلالها الدير غير مرات معدودة .. وكان الاشراف الفعلي فيها لشيوخ الدير

حتى اشعيا المقاري (سعد) وفلتاؤس المقاري المتهمين بالقتل دخلوا الدير من 2007 (قبل استلام البابا شنودة للدير بسنتين) وظلوا تحت الاختبار تحت رعاية مباشرة من الراهب شيشوي المقاري وهو من ولاد ابونا متى (بقاله 40 سنة في الدير) .. وليهم صور متصورين وهما تحت الاختبار مع شيوخ الدير من تلاميذ ابونا متى (وتحديدا ابونا كيرلس المقاري) .. واشعيا المقاري (سعد) بالذات أي حد شاف بروفايله هيلاقيه كان حاطت صور ابونا متى صورة بروفايل وبيشير أقواله وحكايات عنه ومتصور مع كتبه
واتنشرت الصور قبل كدة بدل المرة 100:
https://goo.gl/jkezvw

وفلتاؤس المقاري كان في مجلة مرقس ومعروف طبعا الخط بتاع المجلة وكان بيراجع كتاباته انبا ابيفانيوس شخصيا .. وشهدله بكدة “نجم الصحف والمواقع والتصريحات” الراهب باسليوس المقاري (وكان التصريح دة لموقع الشروق بعد قرارا المجمع بمنع الرهبان من الادلاء باي تصريحات.. بس طبعا دير أبو مقار من زمان اوي “وضعه مختلف”

طب يعني اتنين رهبان قضوا 3 سنين تحت الاختبار بدون شكوى من شيوخ الدير ومنهم سنتين البابا شنودة مكانش موجود فيهم.. سنتين تحت اشراف شيوخ الدير من تلاميذ ابونا متى .. لو كانوا مناوئين ليهم كانوا خلوهم ليه ؟؟؟

واي حد عارف ان البطرك مش من مهامه الاشراف الروحي المباشر على اللي تحت الاختبار .. البطرك بييجي يرسم ويمشي بناءا على نجاحهم في فترة الاختبار اللي بيكون الاشراف الفعلي المباشر فيها لشيوخ الدير .. مفيش راهب بينط على دير بالبراشوط
——————————————————————–

ثانيا: الراهب يوئيل بمنتهى الازدواجية بعد ما أتكلم عن رهبان بيتصرفوا تصرفات لا تليق بالرهبنة.. بيقول ان عشان الحنان والطيبة اللي عند “رئيس الدير” انبا ابيفانيوس ساب الرهبان الفوضوين يعملوا اللي هما عايزينه

يعني البابا شنودة طول ما الدير تحت رعايته (ولو بشكل غير مباشر) سنتين ونص محصلش حاجة من الحاجات دي في الدير.. فيبقى هو السبب وسمح بالتصرفات الفوضوية و”الحمــــقاء” (على حد تعبيره)

ولما انبا ابيفانيوس يقعد 5 سنين ! 5 سنين !!! ماسك الدير بشكل فعلي واشراف مباشر ورسمي بكافة الصلاحيات ويسمح بكل دة يحصل ويسكت (بحسب كلام الراهب يوئيل) .. يبقى اسمها طيبة وحنان !

مش بتكلم على انبا ابيفانيوس لأن كل مسئول له ظروفه الله اعلم بيها .. لكن بناقش ازدواجية وكيل بمكيالين

————————————————————-

ثــــــــــــــــــــــالثـــــــــــــــــــــا والأهـــــــــــــم:
إن الراهب يوئيل المقاري اللي مطلع التسجيل دة اول واحد تم اتهامه بارتكاب التصرفات “الفوضوية” دي في خطابات رسمية!
ومش من البابا شنودة .. لأ .. من ناس من ولاد ابونا متى وتلاميذه وعلى رأسهم ابونا كيرلس المقاري وابونا يوحنا المقاري وكتير من شيوخ الدير .. وكان ابرزهم عشان موضوع وادي الريان

بعض من ولاد ابونا متى كتبوا فيهم خطابات شكاوي منهم شوية لانبا ميخائيل وبعد كدة لما محصلش حاجة بعتوا الشكاوي للمجمع المقدس واشتكوا فيه من استغلالهم (الراهبين يوئيل واليشع المقاري) لـ”شيخوخة وحسن نية الانبا ميخائيل” (بيتهموهم بخداع انبا ميخائيل يعني)

ملخص الاتهامات انهم اتهموا الراهب يوئيل المقاري (اللي مسك ربيتة الدير بعد نياحة ابونا متى) والراهب اليشع المقاري ورهبان تانيين بمخالفة قرارات وتعليمات المجمع المقدس والبابا شنودة !

واتهامات بشراء أراضي بالملايين بدون ضابط وبالخروج عن السلوك الرهباني

واتهموا الراهب يوئيل باستغلال اسم الدير تموينه وفلوسه في مشروعات لا علاقة لها بالدير

واتهموه بانه بيدعم كل تصرفات اليشع المقاري في المخالفات كلها سواءا مالية او رهبانية

واتهموا الراهب يوئيل المقاري انه بيرسم ناس برة دير أبو مقار بمخالفة لقرارات المجمع

واتهموه بالعزم في بسيامة ناس على دير انبا مقار بدون فترة اختبار !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ايوة دة الراهب يوئيل المقاري اللي اتهم البابا شنودة انه عمل فوضى جوة الدير !!!!!!

مش ببعت الكلام عشان اخبط في الراهب يوئيل وخلاص
انما يهمني في المقام الاول اقولك ان كل دة قبل ما البابا شنودة يقرب من الدير

اقصد يعني ان الخلافات دي والاتهامات بالمخالفات والتعاملات المالية بدون ضابط وخروج الرهبان من الدير والفوضى موجودة من قبل كدة وتحديدا في 2007 و2008 .. فهل البابا شنودة كان مسئول عنها هي كمان ؟؟؟

ماهو انبا ميخائيل مطلبش اعفاءه من رئاسة الدير شوية !

وانتهى الامر بان اللجنة المجمعية للرهبنة بحثت الامر وكتبت تقرير فيه حاجات صعبة تتقال او تتنشر

بالنسبة لي الموضوع مش شخص اد ماهو بيستفزني تزوير التاريخ بالشكل الفج دة

الواحد لما يسمع الكلام دة بيتقال يعمل ايه طيب ؟

ما اسهل ان الواحد يقعد يحكي عن المشاكل اللي هناك من قبل ما البابا شنودة يخطي عتبة في الدير !

ما اسهل ان الواحد يتكلم عن اللي حصل في الدير لاسقف سينا المتنيح انبا مكاري ؟

أوعن الراهب رويس اللي مات منتحر هناك سنة 1996 وحالات مشابهة

او نتكلم بالاسماء عن اللي هربوا من الدير وفعلا خضعوا لعلاج نفسي

أو عن الخناقة بتاعتهم على مزرعة دير انبا مقار وسط ما ابونا متى عايش

غير تفاصيل قصة مزرعة وادي النطرون اللي خلاها للراهبات

غير قصة بيت الطلبة بتاع الزتون والفلوس اللي راحتله

ما اسهل ان الواحد ينشر الشكاوي اللي كانوا بيبعتوها في بعض

ما اسهل ان الواحد يحكي في اللي كان بيحصل في الدير قبل ما البابا شنودة يقرب من الدير ..

يعني معظم الحاجات دي كانت تحت رعاية ربيتة الدير الراهب يوئيـــل قبل ما البابا شنودة يقرب من الدير .. وبعد كدة يقول نفس الراهب ان البابا شنودة اللي عمل الفوضى و”التصرفات الحمقاء” !!!

في النهاية يا دكتور عايز بس أقولك ان الحديث عن دير انبا مقار باعتباره كتلتين فقط (واحدة لبابا شنودة والتانية لابونا متى) للأسف كلام مش دقيق .. للأسف هما اكتر من جبهة .. لا دول واحد ولا دول واحد

يعني الرهبان يوحنا وكيرلس وباسليوس واثناسيوس ويوئيل واليشع وانبا ابيفانيوس كلهم ولاد ابونا متى .. بس هل كلهم متفقين ؟؟؟؟؟ ياريت أي حد يسأل ابونا اثناسيوس المقاري بيقول ايه على الراهب باسليوس لما افتى في موضوع الطلاق مثلا

التردد في سيامة اسقف لدير انبا مقار مكانش تباطؤ .. انما كان مين ممكن يرضى عنه الكل وسط كل “الرؤســــاء” اللي جوة الدير بكل خلافاتهم.. وكانت المحاولة بسيامة شخص هادئ الطبع ومش صدامي ومبيزعلش حد .. بس حتى دة منهاش الازمة انما انتهى بالكارثة اللي حطت على دماغنا كلنا بمختلف اتجاهاتنا (ولازم الناس كلها بكل اتجاهاتها تفهم انها على مصيبة جت على دماغنا كلنا)

انا عندي الخطابات من فترة وراكنها لأن نشرها ملوش أي لازمة .. بس بعد اللي سمعته دة .. لو عايز تنشرها انشرها .. وفي حاجات تانية مش ضروري نشرها .. كفاية دول .. لأن الموضوع قلب تزوير للتاريخ واستغلال لسفك دم انسان في سبيل تصفية حسابات مع شخص توفى من 6 سنين !!!

انا اترددت قبل ما ابعتلك الكلام دة
بس سؤال بجد: يعني الواحد يسكت عشان الدنيا متتقلبش زيادة بدون انقسامات ولا يسيب الناس تفتري وتزور التاريخ بمنتهى الفجاجة وعدم حياء وناس تانية تقعد تنشر الكلام دة على انه حقيقة !