الصوم الكبير..الخزين الروحى للمسيحيين

صوم مبارك علي كل الشعب المسيحي السبع أسابيع الصوم الكبير…هتلاقى…. أربع شخصيات حطتهم الكنيسة وبتقرا أناجيلهم …ولازم هتلاقى نفسك فى واحد فيهم..! * الأبن الضال..بيقولك: مهما كانت بشاعة خطيتك اللى عملتها بكامل إرادتك فى حق أبوك…ماتقلقش..إرجع ليه ..هو واقف فى الشُباك يبُص عليك ومستنيك..عايز يلبسك خاتم البنوة وماتُستعبدش..! * السامرية..بتقولك: مهما كان تكرار خطيتك اللى بتقع فيها مره وإتنين وتلاتة وسبعة..مغلوب منها وعبد ليها…ماتفشلش..إتقابل معاه..هو قاعد على بير المايه ومستنيك..عايز يديك ماية حية وماتعطش..! * المخلع..بيقولك: مهما كانت مدة خطيتك اللى عايش فيها عُمرك كله ولو 38 سنة..ماتستسلمش..قوله أُريد ياسيد..هو جاى يدور عليك لما الكل إتخلى عنك ومستنيك..عايز يشفى نفسك وجسدك وماتموتش..! * المولود أعمى..بيقولك: مهما وصلتك خطيتك للعمى الكُلى وشالت منك قرنيتك ومابقاش فيه ذرة أمل..ماتيأسش..نادى عليه جوه قلبك هو سامع آهات قلبك ومستنيك..عايز يعمل بيك أعجوبة وقادر يخلق عيون جديدة تنور قلبك وماتهلكش..! +قد إيه واعية ياكنيستى وعظيمة…! مايفوتش عليكِ صيام من غير ماتعلمى أولادك طريق التوبة يبقى إزاى..وتمسكِ بإيديهم وتمشى بيهم..من الأرض لحد باب السما. ا لصوم الكبير ..ده خزين روحياتنا فى السنة كلهــــا